Ba sukut ke sekali tu, aku sengaja engkah gambar tu kena nyadi ke pengingat aku ngau bala madi enggau petunggal aku ke udah bejalai ngelantang ke ati ba Zoo Johor urung ia bulan 1 taun 2011. Kebuah pia aku ka bekunsi ukai ketegal ti deka mantai ke pemisi tau ka deka ngeninggi diri ari entara kami serumah, tang semina ka mantai ke pengaga ati sereta bekunsi pengerindu ngau pengelantang ati agai semua kelebih agi kami serumah.
Pemeinsa selalu ngajar kitai reti pengidup. Lalu enggau pemerinsa ti ditapi, dia kitai selalu deka keluar ari semua nya enggau sebarang cara ti kadang-kadang enda kala kitai terunding ke ngelama tu. Baka nya meh bala kami menyadi, jalai ke penudi kena ngubah pengidup ianya keluar ari 'kepompong' pemerinsa ba rumah panjai sereta begiga ke pengawa ba menua urang. (Johor)
Terima kasih ngagai petara, laban ti selalu ngemudah ke semua pengawa sereta pemerinsa ti ditapi ruang bilik aku. Semua nya berengkah ari menyadi aku ke indu (Rapinie) diungkup ke petara jadi enggau ika aku ke kerja ba Johor maia nya (diatu kerja offshore). Ia meh ke muka jalai agai kami menyadi nemu lubang ngiga pemakai ti meruan agi ti dibanding enggau ba menua asal ke makai gaji mina cukup aja.
Nusui pasal gaji di menua, aku kala kerja kuli berengkah ari aku pom 2 ba Pakan. Ketegal pemerinsa meh aku ngereja semua nya ti dibanding enggau bala kaban aku ke bukai agi ditunduk ke apai indai enda diasuh kerja. Maia nya aku kerja ngaga kuater cigu ba SK Bandar Bintangor, lalu gaji aku maia nya semina Rm13 sehari. ti dibanding enggau mata duit diatu, nama meh guna gaji nyampau nya. Ba baruh tu aku bisi ngaga list pengawa aku maia ujung taun ianya maia cuti.
1. Kuarter Cigu SK BB + Kilang ba Jalai Lanang Sibu (2002)
2. Perumahan Taman Dusun Indah + Jaya Tiasa Plywood (2003)
3. Perumahan ba Baji (2004)
4. Perumahan ba Baji (2005)
5. Pelabuhan Perikanan Tg Manis (2006)
6. STPM (2007)
7. Perumahan ba Pasar Saratok (Jan-Mei 2008)
8. Perumahan ba Taman Malihah (Dis 2008)
9. Perumahan belakang JPJ Kuching (Dis2009)
10.Kilang InterState Packages, Johor (Dis2010)
Aku sangka, udah aku masuk Universiti aku badu agi ngereja semua pengawa baka nya. Tang sangka aku nya jauh salah laban ketegal ke enggai ngenusah apai indai enggau bala menyadi melanja sekula, nya meh ke ngasuh aku lebih agi ngembuan pengeliat ati ngereja semua nya.
Ketegal semua penguji nya, nya kebuah diatu aku ulih ngembuan nama utai ke deka dikembuan ke aku taja aku agi belajar. Aku enda kala ngeletak tanggung jawab melanja aku sekula agai apai indai enggau bala menyadi agi tang aku ngelaban ati diri ngambi ke aku ulih mega nulung ngelempung meri belanja agai sida ti lebuh sida nadai sereta ti lebuh maia nya aku bisi duit lebih. Terima kasih Tuhan, ketegal ti udah ngajar aku reti pemerinsa sereta ngelempung ke semua nya nitih ke peneka Nuan. Tuhan, aku selalu bearap Nuan semampai ngiring ngembing kami sebilik enggau urang bukai mega dalam tiap pikir, runding serta kerja ti digaga kami.
A.m.i.n. . . . . .
Selamat belantang ati enggau gambar tu....
Madi aku (Baju Burak), Ika aku, enggau anak menyadi aku.
Ngetu belelak sepengudah bejalai ngelingi Zoo..
Anak menyadi aku ke tuai ngau anak petunggal
Belelak enda lama seraya ke ngisi perut
Ika aku enggau madi aku ke pemadu maioh bebudi ngagai ruang bilik kami terutama ba senentang melanja bala kami ke sekula.
Aka aku ke paling tuai (Rapinie) enggau anak ia (Stephanie Rani)
Rapinie, Aka ke pemadu disayau...
Petunggal bilik sepiak, ngau bala anak ia..
Aku; orang ke bempu blog tu.... Heehehee...POSE...!!
Menyadi aku ke no. 4 (Jimmy) ngau bini ia..
Pengingat ke semampai ba lubuk ati...(Zoo Johor)
Unta: Jelu ke pemadu familiar enggau padang pasir
Baka tu meh rampa menua ba Zoo Johor..
Remaung negong ba lubang gua..
Bala petunggal sebilik...
Dikarang oleh:
anak asal Tr. Meringgai Bebelit..
Munan Ak Angkom@
[AnakTemuai NanT]
