Ensera Aloi Mati Kentut

Nyadi ensera tu barengkah ari Aloi seduai Ini iya ke diau nyembuah kadiri di Nanga Sungai ti dikumbai Sungai Isang Babelit, dalam Pati Batang Gelong. Seduai iya diau enda bangat jauh ari ulu Nanga Gelong. Orang ke diau ari ili seduai iya pan maioh mega, laban menoa nya ke nyau semak pasar ka bisi ba Nanga Sungai nya.

Nyadi sakali nyepi diri nyau puas makai nadai lauk, dia Ini Aloi lalu bejako enggau Aloi. “Aloi, pama nuan undor ka pasar, ngipa utai ka lauk. Nyau puas nadai lauk, nadai garam,” ko Ini iya bejako.

“Au, meh Ini, lagi meh aku undur ka pasar, nyangka bisi sida uda mai kasam,” ko saut Aloi.

Udah nya Aloi lalu beradu. Nyadi Aloi ke beradu tu tadi baka ke enda, tak samina melit ka sirat sebelit aja. Udah iya tembu melit ke anak sirat iya, Aloi lalu nurun minching sengayuh siti. Datai ba pengkalan, endang enda chachamang lalu nepan ka perau, lalu belabuh bekayuh penapat inat. Iya bekayuh sapagi-pagi. Peluh tudah Aloi ngenjing bekarenjoi nurun kening. Enti baka iya bebaju endang sigi tentu basah laban peloh, tang laban iya ke enda bebaju. Nyau kelama-lama iya ke udah dugau-dugau bekayuh, dia deh iya ninga auh kukok manok. “Ah! Enda jauh agi pasar,” pia ko ati iya bejako kediri berandau nengali. Nyau ka lama dinga gerong-gerong labu orang mansang nyauk datai ari atas. Ari maia nya nyau ka tengah hari.

“Nama nya nuan deh Aloi?” pia ko Ini iya.

“Nama nya nuan ga deh Ini?” ko saut iya. “Kemaia nuan datai ditu deh Ini?” ko iya nanya Ini iya.

“Nama utai ditanya ka nuan. Tu ga endang pengkalan kitai.” Ko saut Ini iya.

Angkat deh Aloi tu tadi enda ingat muka tali perau ari liking. Iya ke bekayuh nya tadi endang enda mindah ari pengkalan sida empu.

“Aih deh Aloi. Andal-andal aku ngumbai nuan udah datai di pasar meli lauk. Enti pia, aram meh tua sama undor ka pasar.” Pia ko Ini iya.

Ini iya lalu muka tali perau ari liking, serta ngejang ke luan perau. Seduai lalu berkayuh undur ngili ai Gelong. Apin bangat jauh udah seduai ngejang la pengkalan, dia Aloi lalu tepeda ka bangkai ukoi. Aloi enda senunoh bendar, endang sebarang utai rara.

“Nama nya tak baka ukoi tua deh Ini?” ko iya.

“Badu enda iya meh nya.” Ko Ini iya nyaut.

“Enda tua tau nyadi undor, Ini. Jai burung tua.” Ko Aloi.

Enda meh seduai nyadi undur ka pasar, laban udah meda bangkai ukoi ba rantu ai. Nya ga jai burong ko Aloi.

Ukoi nya udah mati kira dua tiga hari dulu ari nya, diatu iya nyau melepong laban ke udah nyau bentut serta bau buot. Leboh Aloi narit bangkai ukoi dia iya nanya, “Kati alai bangkai ukoi tu tak bebau deh Ini? Mati ukoi tu?” ko iya.

“Au, udah mati meh ukoi nya,” ko saut Ini iya. “Nama utai nya bebau buot sium nuan, udah mati meh nya,” ko Ini iya madah ka Aloi.

Nyadi pagi siti Aloi seduai Ini iya pan sama tumu beradu deka undur ka pasar ngalu utai ka lauk. Seduai lalu sama nepan ngagai perau ti endang udah dibuka Ini Aloi lalu undur ngili sungai. Kira tiga tanjong seduai udah undur ngili ka ai, dia seduai lalu betemu enggau bangkai but ukoi tepanggai ba tugong reba ti betakat ba tengah ai. Bau bangkai ukoi ngenjing nempoh lubang idong. Tang endang baka Aloi, sebarang utai rara.

“Kati alai ukoi nya bebau Ini? Mati ukoi nya?” ko Aloi.

“Au, udah mati meh ukoi nya,” ko Ini iya nyaut ari luan perau.

Seduai iya pan majak ka diri berkayuh seruran regup-regup ngili ai. Nyau ka lama seduai ti udah bekayuh, dia deh Ini Aloi lalu kentut. Nyau berenyang asai perau kena kesuh kentut Ini Aloi, serta balat bendar bau. Laban iya ke dudok di luan perau, nya alai bau kentut balat bendar ngesuh ngagai Aloi serta nempoh iya ke ngemudi ka perau.

“Apu! Mati meh Ini aku tu,” pia ka Aloi bejako dalam ati diri. Iya pan lalu tusah ati ngenang Ini iya ke udah mati. Luan perau lalu dituntung ka iya ngagai tebing. Ini iya lalu engkechit ka tebing nyangka Aloi mai iya ngetu enda lama. Udah nya Aloi lalu ngejang ka perau iya baru ari tebing ngagai puak ai.

“Nama main nuan nyangkai ka aku ditu dah uchu?” ko Ini iya ngangau ka Aloi ari tebing.

“Nuan ga udah mati deh Ini,” ko Aloi.

“Apin aku mati deh uchu,” pia ko tudah Ini iya nyaut Aloi.

“Mati meh nuan Ini. Nuan ga nyau udah bau buot deh,” ko Aloi ngelaban Ini iya dia.

Udah nya kejang ke iya perau takut ke Ini iya ke udah mati nitih ka iya baru ko ati iya.

“Endai …… Keba nuan tambap deh Aloi.” ko Ini iya ngangau ari jauh.

Dia Aloi lalu beguai mupok bekayuh. Iya enda beduli ka kanggau Ini iya agi. Dia iya lalu bekayuh kediri-diri ngili ai. Enda bangat lama iya udah bekayuh, dia iya lalu ninga burong richah bendar ba tebing sungai nya.

“Nama utai empa burong nya da dia?” ko ati iya.

Datai iya ba senentang burong ke richah, Aloi lalu rangap-rangap engkadah ka atas. Peda iya bala burung mit enggau burong ke besai nyau bebintih berebut makai buah kara. Peda iya jelu anak pan ngemaioh nya mega. Da tan-tan ke iya perau enggau sengayuh sambil rangap-rangap nengkadah burong enggau jelu ba puchok kara. Sepi iya tak merubas tama rekong iya, lalu telan iya. Utai ke labuh nya tadi iya nya tai engkerabak enggau tai bala burung.

“Ho! Udah mansau endar buah kara, nama tu tak nyau penat asai buah tu tama nyawa aku deh?” ko ati iya. Iya pan majak muka mulut diri nerima utai ke labuh ari puchok kara nya. Aloi pan nyau kenyang laban pemaioh tai jelu enggau tai burong ti laboh tama nyawa iya. Udah nya Aloi lalu bekayuh nat ke perut nyau segai kenyang. Lama agi segai agi ga asai perut iya. Purus iya perut sepi nyau tengelam belit sirat laban angin dalam perut. Apin bangat jauh ari nya, dia iya tak lalu kentut inggar bendar. Nyau berenyang asai perau kena kesuh kentut Aloi.

“Apu!” ko iya, “Enti baka tu mati nangga hari meh aku tu deh, parai nyengai lemai.”

Bau kentu Aloinya tadi nyau baka bau buot ukoi. Aloi tu tadi lalu tusah ati berunding ka diri ke mati. Dia iya nyau enda engkebut dudok dugau-dugau ba kemudi perau baka bangkai. Sengayuh ke dikena iya nyau tebalengka ari jari. Perau iya lepong-lepong rarat ngili ai. Leboh iya mansa rumah orang, dia orang alit ati meda gaya iya. Ditanya orang ke dipansa iya, endang enda nyaut sakali laban ti udah mati ko penemu iya.

Leboh iya tepeda ka buah nyau mirah mansau, dia iya lalu mengkelak, “Ah! Sayau meh aku tu udah mati. Enti aku enda udah mati, tentu aku olih niki lalu makai buah nyin,” ko iya bejako kediri, berandau nengali.

Maioh macham buah bukai dipeda iya. Ari ili nya dia iya meda orang nyual ikan, undang, burung, keli enggau macham lauk bukai. Leboh iya mansa pasar dia iya balat agi ga tusah ati. Orang ke bepansa enggau iya pan alit bendar ati meda iya tak beranyut enggau perau enda kebut-kebut.

Nyau kelama udah nya, perau iya lalu pansut ari nanga sungai ngagai tasik besai ledong lalinang. Dia iya lalu besatup enggau ribut ke bepuput bepulas uchong, angin ke bepusin puting beliong, kilat jampat ngelambai bungkong, guntur temepur inggar tetaung, bakul muat gelumbang besabong, mangka ka januar kapal lambong, putus serumbong patah singkilong rantai besi.

Nyadi perau Aloi ama tenggelam ama melepong ama telentang ama mengkanjong. Iya empu nyau tenggelam ditaban ke bangkung. Nadai agi pegari panjong, enggau orang ka Tanjong stak-stong, betumpu dan enggau wong tujoh beranggong, tuai sebayan ke dajan dulu pumpong, mandi di lepong mandai mati. Mati meh tudah Aloi nengali hari, parai meh Aloi nengali lemai, dajan meh tudah Aloi Tambap nyenggai bulan.